Eth 75% dera nòsta planeta ei format per aigua, e tota aguesta massa se dividís en cinc oceans.
Er Ocean Atlantic banhe es còstes orientaus d’America, es d’Euròpa e es d’Africa der Oèst. Eth sòn nòm proven d’ua civilizacion mitica, es atlants, que non a estat trobada mai. Es prumèrs vaishèths de granes dimensions que comencèren a navegar pes sues aigües receberen eth nòm de transatlantics.
Er Ocean Indian banhe es còstes d’Africa der Èst e deth sud deth continent asiatic. Recep eth sòn nòm dera Índia, qu’ei banhada per les sues aigües.
Er Ocean Pacific ei eth mès gran de toti, e aucupe ua tresau partida dera nòsta planeta Banhe es còstes orientaus asiatiques e occidentaus americanes. Ei tanben a on se tròben era majoria des isles d’Oceania. Tanben a eth punt mès prigond coneishut, era Hòssa des isles Marianes, a onze quilomètres jos eth nivèu dera mar. Er explorador Ferrand Magellan li balhèc eth sòn nòm en sègle XVI perque didie qu’ère ua mar fòrça tranquilla, encara que tanben patís tempèstes e ersatge de granes proporcions.
Er Ocean Glaciau Artic se tròbe ath torn deth Pòl Nòrd e er Ocean Glaciau Antartic entornège eth Pòl Sud e era Antartida, eth continent gelat. Es temperatures son extremament heiredes en toti dus oceans.
