Eth Reiaume Unit dera Gran Bretanha e d’Irlanda deth Nòrd ei un estat plurinacionau europèu qu’aucupe era isla de Gran Bretanha e eth nòrd d’Irlanda. Era sua poblacion ei d’ath torn de seishanta milions d’abitants e era sua capitau ei era ciutat de Londres.
Ei ua monarquia parlamentària damb era dinastia des Windsor-Mountbatten. Eth rei actuau ei Carles III.
Es nacions que formen eth Reiaume Unit son Anglatèrra, Escòcia, Galles e Irlanda deth Nòrd. Es tres darrères gaudissen d’ua autonomia damb govèrn e parlament o assemblada pròpris.
Era lengua oficiau ei er anglés, mès eth gaelic d’Escòcia e eth gallés, totes dues lengües celtiques, son tanben oficiaus enes sòns territòris.
Era union d’Anglatèrra e Escòcia ath començament deth sègle XVIII dèc lòc ara creacion deth Reiaume Unit. Abans, en sègle XIII, Anglatèrra auie conquistat Galles e, des deth sègle XV, Irlanda.
Eth Reiaume Unit inicièc era Revolucion Industriau entà miei sègle XVIII e construïc un empèri enorme en cinc continents pendent eth sègle XIX, era epòca dera sua màger esplendor, que coïncidís damb eth reinatge dera reina Victòria: ei era èra victoriana.
Guanhèc es dues guèrres mondiaus e abandonèc era Union Europèa, eth Brexit, er an 2020. Era sua moneda ei era liura esterlina.
Sabíetz qu’en sègle XVII, pendent quauqui ans, Anglatèrra siguec ua republica?
