Siguec reina d’Anglatèrra, d’Escòcia e de fòrça d’auti reiaumes que formauen er Empèri Britanic e, a compdar der an 1876, emperairitz dera Índia. Ua des reines mès mitiques dera Istòria.
Neishec er an 1819 laguens dera dinastia des Hannòver, que regnauen en Anglatèrra des deth sègle XVIII, e succedic detz-e-ueit ans mès tard ath sòn oncle Guilhèm IV. Se maridèc damb un prince bèlga, Albèrt, deth linhatge des Saxònia-Coburg Gotha, damb qui auec nau hilhs.
Pendent eth sòn long reinatge enquiar an 1901 (seishanta-quate ans) Gran Bretanha experimentèc grani cambis, çò qu’a hèt qu’aguest periòde sigue nomentat era “èra victoriana”.
Gran Bretanha consolidèc era Revolucion Industriau, iniciaument en sector textil, que la convertic ena prumèra poténcia economica mondiau. Es ciutats britaniques comencèren de créisher. Totun, eth camp se despoblaue e i auie barris urbans damb fòrça praubetat. Londres semblaue era capitau deth mon, mès i auec tanben fòrça emigracion entàs Estats Units, Austràlia, Canadà…
Era Revolucion Industriau anèc acompanhada de descurbiments scientifics, e era esplendor britanica se demostrèc ena Prumèra Exposicion Internacionau, celebrada en Londres er an 1851, a on se mostrauen es auanci dera societat industriau.
Era reina Victòria moric er an 1901 e siguec succedida peth sòn hilh Edoard VII, mès molti des sòns hilhs e arrehilhs aucupèren d’auti trons europèus.
Quini auti grani personatges istorics coneishetz?
