Es Estats Units d’America son ua nacion de mès de tres cents milions d’abitants, en continent american. Formen ua federacion de cinquanta estats, que se repartissen eth poder damb eth govèrn nacionau federau en Washington. Bères ciutats importantes son Naua York, Los Angeles, Atlanta, San Francisco o Boston e bèri des estats mès coneishudi son Califòrnia, Texas, Florida, Geòrgia, Loïsiana, Alaska, Hawaii o Virginia.
Limite ath nòrd damb eth Canadà, ath sud damb Mexic, e es sues còstes son enes oceans Atlantic (èst) e Pacific (oèst). Es Estats Units non an lengua oficiau, mès cada estat n’a era sua. Era lengua mès parlada e coneishuda ei er anglés, mès pendent es darrères decades eth castelhan a incrementat era sua preséncia.
Es Estats Units preneren era sua independéncia dera Grana Bretanha er an 1776 damb era Guèrra d’Independéncia o Revolucion Americana. Entre es ans 1861 e 1865 patiren era sua guèrra civiu, o Guèrra de Secession, quan bèri estats deth sud decidiren de separar-se entà poder mantier er esclavatge. An prenut part enes dues guèrres mondiaus deth sègle XX, en tot hèr part deth partit vencedor.
Tot e qu’era majoria des abitants son descendents d’immigrants des Isles Britaniques, i a ua grana preséncia d’autes etnies, coma es ispanics, es afroamericans (descendents des esclaus africans), italians, chinesi… e es indis originaris s’an convertit en ua minoria.
Era sua economia ei ua des mès importantes deth mon, e era sua cultura (musica, cinèma, series de television…) ei coneishuda enes cinc continents.
