Ei un estat independent europèu qu’aucupe lèu tota era Peninsula Italiana e es isles de Sardenha e Sicília. I demoren mès de seishanta milions de persones e, encara que s’i parlen un pialèr de lengües, era soleta qu’ei oficiau ei er italian, basat en antic parlar dera Toscana, ua des sues regions.
Era capitau ei era ciutat de Roma, ua des mès antiques deth continent europèu. Actuaument ei ua Republica, e siguec un des sòcis fondadors des Comunitats Europèes. D’autes ciutats importantes son Milan, Turin, Venècia e Nàpols.
Era istòria d’Itàlia ei fòrça longa e en Roma constituïren un empèri que dominèc tota era Mediterranèa pendent sègles. Posteriorament, dempús dera casuda de Roma e er en·honsament de diuèrsi règnes germanics, eth territòri italian demorèc dividit en diuèrsi estats independents. Un d’eri, es Estats Pontificaus, jos eth govèrn deth Papa de Roma. Finaument, er an 1861 eth règne deth Piemont comencèc eth procès d’unificacion de tota Itàlia.
Itàlia s’a destacat tanben pera sua grana importància culturau, ena epòca der Empèri Roman mès tanben pendent eth Reneishement (sègles XV e XVI) damb era recuperacion dera tradicion classica grèga e latina.
Er occitan ei parlat ena region deth Piemont e en pòble dera Gàrdia.
Vos shautarie de visitar Itàlia?
