Tostemp s’a dit que Cristòl Colomb descurbic America eth dia 12 d’octobre de 1492. Aué sabem qu’es vikings auien arribat uns sègles endarrèr pr’amor que s’a trapat rèstes de quauqui poblats sòns en America deth Nòrd.
Cristòl Colomb se pensaue que, s’era Tèrra ère redona, se podie arribar enes Índies (eth continent asiatic) en tot navegar entar oèst e crotzar er ocean Atlantic. D’aguesta manèra s’evitaue trauessar tot Àsia en uns moments que i auie ua situacion plan conflictiva entre eth mon cristian e eth musulman.
Dempús de demanar ajuda economica ara reina Isabèl de Castelha, Colomb gessec eth dia 3 d’agost de 1492 damb tres caravèles, era Santa María, era Pinta e era Niña, qu’eth 12 d’octobre toquèren tèrra fèrma. Eth se pensaue qu’auie arribat ena Índia, mès en realitat auie estramuncat damb ua isla caribenca aperada Guanahani (qu’aué serie ua des isles Bahames).
Colomb tornèc tà Castelha entà explicar era sua trobalha e encara hec tres viatges mès abans de morir. Aquerò ère er inici dera conquista e colonizacion deth continent american.
Sabíetz que non ei clar a on neishec Colomb exactament? Era teoria tradicionau senhale era ciutat italiana de Gènoa, mès i a especialistes que ne defensen d’autes origines.
