Damb eth sòn teatre, Shakespeare a estat considerat coma er escrivan mès important en lengua anglesa e tot un simbèu dera cultura mondiau. Neishec er an 1564 en Stratford-upon-Avon e i moric eth dia 23 d’abriu de 1616 (eth dia deth Libre).
Maugrat que compausèc tanben poèmes, ei coneishut sustot pera sua òbra teatrau, qu’escriuec mès que mès en Londres pendent eth reinatge d’Elisabèt I, dera dinastia des Tudor, e deth sòn successor Jaume I, deth linhatge des Stuart. Es sues òbres, representades plan soent en teatre The Globe dera capitau anglesa, aueren un gran succès de public.
Era caracteristica principau deth teatre de William Shakespeare ei qu’er autor, damb es personatges des sues òbres, mostrèc ara perfeccion es sentiments umans. En Romèu e Julieta, er amor; en Otello, era gelosia; en Eth mercadèr de Venècia, era avarícia, en Hamlet, damb era sua mitica frasa “Èster o non èster, vaquí era qüestion”, eth dobte.
Aué es sues òbres se representen constantament en mon entièr en multiples versions e se n’an hèt bères adaptacions tanben entath cinèma.
Sabíetz que, ena epòca de Shakespeare, es hemnes non podien actuar en teatre e es sòns personatges èren interpretadi per òmes?
